Lars Sture lea ođđa jođiheaddji Kunstnerforbundetas

Kunstnerforbundeta stivra lea dárkilit meannudan 25 ohcama beaivválaš jođiheaddji virgái, ja leat dál ilus almmuhit ahte Lars Sture lea giitán jođihišgoahtit Kunstnerforbundet.

Govva Lars Stures gii lea Kunstnerforbundeta ođđa jođiheaddji
Lars Sture lea Kunstnerforbundeta ođđa jođiheaddji — Govven: Kaja Bruskeland

-         Sturein mii fitnet áŋgiris, doaimmalaš ja gudneáŋgiris jođiheaddji geas leat nana návccat bargat guhkesáigásaš perspektiivaiguin ja liegga beroštumiin dán ásahusa guovddášárvvuide. Mii illudit hui sakka go beassat bovdet su bargovásáhusaid, dieđu ja máhttu min searvái, dadjá Kunstnerforbundeta stivrajođiheaddji Mattias Härenstam.

Lars Sture lea máŋga jagi bargán kuráhtorin ja dáiddárin, ja sus leamaš ovddasvástádus máŋga čájáhusaid ja prošeavttaid ovddas dáiddaásahusain, museain ja gállerijain sihke Norggas ja riikkaidgaskasaččat.

Sture dovdá máiddái sámi dáidda- ja duodjesuorggi bures. Son lea máŋŋemuš jagiid bargan kuráhtorin Norwegian Crafts nammasaš organisašuvnnas mii ovddida dáiddaduoji Norggas ja Sámis olgoriikii. Doppe son jođiha dáiddálaš buvttadusaid ovddideami ja sus lea maiddái ovddasvástádus organisašuvnna teorijaovddidanprošeavttaid ja riikkaidgaskasaš čájáhusprográmma ovddas. Dán barggus son lea mátkoštan Sámis ja iluin oahpásnuvvan sámi dáiddáriiguin ja duojáriiguin ja leamaš mielde álggahit ja doaimmahit iešguđet prošeavttaid dáiguin. Son earret eará álggahii girjeprošeavtta Duodji Reader mas Harald Gaski ja Gunvor Guttorm guoktá leaba doaimmaheaddjit, ja maid Davvi Girji almmuhuvvii dán dálvve. Girjjis leat guoktenuppelot čállosa duoji birra.

Lars Sture dovdá Kunstnerforbundet bures ovdagihtii, earret eará go son kuráhterii čájáhusa Everyone Says Hello 2019:s. Čájáhusas ledje moaddenuppelot čikŋadáiddára sihke Norggas ja olgoriikkas eret mielde, earret eará čájehii Máret Ánne Sara ovttasbarggu Matt Lambertiin, mas ledje iešguđet čiŋat rahkaduvvon bohccodávttiguin.

-         Mun illudan dohpet barggu joatkit ovddidit dán eahpegávppálaš čájáhus- ja gaskkustanásahusa maid dáiddárat iežaset stivret, ja nanusmáhttit dán čielga jiena dálááiggis. Kunstnerforbundet lea badjel čuođi jagi leamaš dehálaš sadji dáidda, dáiddáriid ja dáiddálaš ekonomiija várás gitta otná beaivái, ja dát lea mearkkašahtti dáiddaásahus mii gáskkusta dáiddasuorggi perspektiivvaid servodatságastallamiidda, dadjá Sture.

Sture lei olgguldas konsuleantan mielde plánet ja ásahit mastergrádaoahppu čikŋadáidagis Central St. Martin’s College of Art/University of the Arts Londonis, ja šattai máŋŋelaš dán oahppu vuosttaš oahppojođiheaddji. Son lea leamaš bagadeaddji, oahpaheaddji, logaldalli ja sensor máŋga allaoahppoásahusain Stuorra-Británnias, Ruoŧas ja Norggas. Son lea maiddái bargan čállin ja redaktevran. Dáiddárin Stures leat leamaš olu čájáhusat ja sihke museat ja almmolaš ja priváhta čoakkaldagat leat oastán su dáidagiid. Stures leat dasa lassin máŋga dehálaš ámmáhat dálááigedáiddasuorggis, earret eará miellahtun Norgga Kulturráđi govvadáidaga fágalávdegottis.

Sture lea gazzan kuráhtoroahppu Bergen Dáiddaallaskuvllas (2012) (dálá Dáidda, musihka ja hábmema fakultehtas Bergen Universitehtas), váldofága Stáhta Giehtaduodje- ja Dáiddaindustrijaskuvllas (1992) (dálá Oslo Dáiddaallaskuvla (KHIO)) ja Higher National Diploma (HND, 1988) Epsom dáiddaskuvllas Stuorra-Británnias.

Sture álgá jođiheaddjin borgemánu vuosttaš beaivve 2022 vihttajahkásaš virggis.

Virggidanlávdegotiis leamaš mielde Mattias Härenstam (stivrajođiheaddji ja dáiddár), Ingrid Lønningdal (stivraláhttu ja dáiddár) ja Anne Marte Archer (bargiid ovdideaddji). Kunstnerforbundeta stivrras leat, eará go Härenstam ja Lønningdal, vel dáiddárat Mari Slaattelid, John Raustein, Geir Harald Samuelsen ja Margareta Bergman (várreláhttu) mielde.

Motta nyhetsbrev

Nyhetsbrevet sendes ut i forkant av utstillinger, samt ved kunstnersamtaler og andre viktige hendelser.

Personvern