Bures boahtin Sámi álbmotbeaidoaluide Kunstnerforbundehas, vuossárgga 6. beaivve guovvamánus. Marita Isobel Solberg doallá performánssa dii. 13.00, ja musihkka- ja performánsadáiddajoavku MARAS doallá konseartta dii. 18.00. Dáiddačájáhus Giđđadálvi nuppi ceahkkis čájeha olu sámi ja kveana dáidagiid.
Marita Isobel Solberggas lea ođđa dáiddačájáhus Kunstnerforbundehas, Agálaš čuolbma / Valknute / Valknut, mii bistá guovvamánu 19. beaivvi rádjai. Sámi álbmotbeaivve čájeha Solberg ođđa performánsdáidaga ja bovde ođđajageseremonijái ja buhtastanrituálii. Son áigu baldit eret baháid ja vášuid ja buktit doaivvu, inspirašuvnna ja ođđa návccaid dálá dilláid ja boahteáigái. Performánsa lea inspirerejuvvon ođđabeaigállát nammasaš dološ árbevierus Olmmáivákkis. Solberga ruovttobáikkis lávejit ođđajageruohta coggat máskka maid leat duddjon čáđagaskka vássán jagi ja vázzit fárrolága ráiddus vákki čađa. Loahpas de bálkestit máskkaid dollii ja buot vássán baháid ja vášuid boaldit eret.
Performánsa álgá Ráđđeviesu olggobealde ovtta áigge ja bovde buohkaid Kunstnerforbundii sisa. Gallerija doallá rabas maŋŋá doaluid. Solberga čájáhus lea vuosttaš ceahkkis. Nuppi ceahkkis lea vel searra čájáhus sámi dáidagiiguin kuraterejuvvon erenomážit Sámi álbmotbeaivvi ávvudeami dihtii.
MARAS čuojahit musihka mii boktá gamolaš, poehtalaš ja psykedelálaš jietnaluonddu mas vuhttujit árvvas árbevierut. MARAS lea musihkka- ja performánsadáiddajoavku mii alo lea jođus ja golgamin. Dološ davvirikkalaš musihkkahámiid ja lávlunárbevieruid vuođul, nu mo juoigan, chant ja lávlun, sii dollejit guldaleaddji, intuitiiva ja hypnotalaš mátkái doaivvun dahkat váikkuheaddji sparaidemiid min millii.
Dán konseartta oktavuođas MARAS joavkku láhttut leaba Marita Isobel Solberg ja Risto Puurunen (Cleaning Women), ja erenoamaš ja hearvás vuogiin soai lávkeba lávdái.
Konsearta lea nuvtta ja lea sadji 50 gussiide. Ii darbbas ovdagihtii dieđihit. Doalut lea Atelier Kunstnerforbundehas mii lea njealjját ceahkkis ja mis dađi bahábut ii leat heaisa visttis.
Giđđadálvi lea searra čájáhus kuraterejuvvon erenomážit Sámi álbmotbeaivvi ávvudeami dihtii. Čájáhusas nuppi ceahkkis beassá oaidnit ja oastit dáidagiid sámi ja kveana dáiddáriin ja eará dáiddabarggut main lea iešguđetláganat oktavuođat sámevuhtii. Dán čájáhusas leat maiddái girjjit sámi dáidda birra ja vel ođđa dáiddabarggut daža dáiddáriin ja dáiddaduojáriin.
Kunstnerforbundet áŋgiruššá čájehit sámi dáidaga guovdo Oslo gávpoga ja lea dáid maŋimuš jagiid lágidan sihke sierračájáhusaid ja doaluid sámi dáiddariiguin ja musihkáriiguin. Dáiddabuvddas fitne miehtá jagi oastimis sámi, daža ja eará dáidagiid ja dáiddadujiid.
Čájáhusas leat mielde Hans Ragnar Mathisen, Hanne Grete Einarsen, Brit Fuglevaag, Geir Tore Holm, Christin Løkke, Åsne Kummeneje Mellem, Tonje Plur, Máret Ánne Sara, Marita Isobel Solberg, Marte Lill Somby, Erika Stöckel, Silje Figenshou Thoresen, Kiyoshi Yamamoto, Marsil Andelov Al-Mahamid ja eará dáiddárat.
Sámi kurahtor ja Kunsterforbundeha gulahallanbargi Raisa Porsanger lea hábmen čájáhusa.
Čájáhusat leat rabas sotnabeaivve 19. beaivvi guovvamánu radjai.
Publisert 1. februar 2023
Sist oppdatert 2. februar 2023