Bibelhistorier

Hanne Nielsen er kjend for utsøkt presisjon i maleriet, i koloritt så vel som i figurasjon. Ho har i heile si verksemd relatert seg til kunsthistoria. Denne gongen gjer ho det via dei kjende forteljingane frå Det Gamle Testamentet, slik ho hugsar dei frå barndomens bibelhistorie. Kunstnarar har brukt dette materialet i århundrer, og Nielsen ville undersøke om det er muleg å jobbe med desse forteljingane i dag. Særleg var det gjensynet med Rembrandts raske skisser over temaet, der enklaste linjeføringar på magisk vis får fram dei mest storslåtte tablå, der strek og materie så å seie har fått visjonen implementert i seg, som sette i gang ønsket om å arbeide med dette innhaldet sjølv.

Der dei bibelske legendene breispektra formidlar om menneskelivets drama, speglar og visualiserer Nielsen innhaldet med uventa og personleg grep, utan å gå omvegen om det teatrale. Ho beveger seg frå det enkle, abstrakte mot eit skjeringspunkt der mystikken så å seie tar konkret form. Bildetitlane er setningsfragment frå dei ulike tekstene ho har hatt som utgangspunkt, t.d. Melk og honning, Er jeg min brors vokter? og Vannene omringet mig like til sjelen.

I serien med maleri til denne utstillinga søker Nielsen mot eit opnare og meir direkte uttrykk enn før.

Dette er tredje gong Hanne Nielsen stiller ut i Kunstnerforbundet. Ho har hatt fleire separatutstillingar og vore med på mange kollektivutstillingar i Norge og i utlandet.
Arbeid av Nielsen er innkjøpt av Nasjonalgalleriet, Museet for samtidskunst, Henie Onstad Kunstsenter, Kunstindustrimuseet m.m.
Gunnhild Bakke