Guovvamánu 6. b. 2025, sullii dii. 13.30
Mii ávvudit Sámi álbmotbeaivvi Kunstnerforbundehis, ja leat bovden dáiddárčeahppiid Inga-Wiktoria Påve ja Mary Ailonieida Sombán Mari ságastallamii. Sombán Mari áigu vel lohkat jitnosit iežas fámolaš divttaid ovdal ságastallama.
Påve ja Sombán Mari leaba guktot dáiddačeahppit iešguđet buolvvas. Inga-Wiktoria Påve lea nuorra sámi dáiddár, duojár ja illustratevra gii aiddo dál doallá sierračájáhusa Dolla addos fámu // i skymningstimmen jag dristar mig Kunstnerforbundehis. Girječálli ja govvadáiddár Mary Ailonieida Sombán Mari ges searvvai ovtta stuora málagovain Kunstnerforbundeha geassečájáhussii Gálgat mohkiid, duogŋat gokčasiid diibmá. Sámi árbevierut, muitaleapmi ja boares osku ja mytologiija lea vuđolaš fáttát guktuid sudno dáiddálaš bargguin. Šerres ivnniiguin soai ráhkadeaba govaid mat muitalit sámi kultuvrra muitalusaid ja vuoiŋŋalašvuođa birra. Sihke Påve ja Sombán Mari bárgaba girjjálašvuohtasuorggis: Påve lea illustreren olu románaid ja diktagirjjiid, ja Sombán Mari lea ges čállán olu mánáidgirjjiid, románaid ja diktagirjjid mat lea dehálačča min girjjalašvuođa historjjás. Ságastallan čálmmostahttá mo sámi muitalanárbevierru čátnasa oskui, girjjálašvuhtii, duodjái ja govvadáidagii.
Dáiddár ja kuráhtor Raisa Porsanger, gii maiddái bargá gulahallamiin ja diehtojuohkimiin Kunstnerforbundehis, láide ságastallama.
Min doalut geavvá dađi maŋŋá go almmolaš ávvudoalut Ráđđeviesus leat geargan. Ságastallan lea gallerija nuppi ceahkkis, gos Påve čájáhus lea.
Sihke doalut ja čájáhus lea nuvttá ja rabas buohkaide.
Doaluide leat ožžon doarjju Sámedikkis.
Inga-Wiktoria Påve (r. 1990) boahtá Látteváris, Girona gielddas Ruoŧa bealde. Son lea bajásšaddan boazodoalus Sárevuomi čearus ja lea govvadáiddár, duojár ja dáiddaduojár. Son lea gázzan dáiddaoahppu Gotlándda dáiddaskuvllas ja Ubme universitehtas, gos maiddái lea lohkan sámegieloahpaheaddjin. Dasto lea oahpan duoji Sámiid Oahpahusguovddážis Johkamohkis. Son lea maiddái rahkadan illustrašuvnnaid máŋga románaide ja diktačoakkálmasaide mat leat namuhuvvon earret eará Davviriikkalaš Ráđi bálkkašumiide girjjálašvuođas ja mánáid- ja nuoraidgirjjálašvuođas. Maŋimuš girji mii namuhuvvoi lea Leŋges hearggi, Sáhčal fatnasa (2023), maid su isit Fredrik Prost lea čállán ja almmuhan dušše davvisámegillii.
Loga eambbo Inga-Wiktoria Påve čájáhusa birra dás: Dolla addos fámu // i skymningstimmen jag dristar mig.
Čájáhus bistá guovvamánu 16. b. 2025 radjái.
Mary Ailonieida Sombán Mari (r. 1953) lea deanulaš ja orru Sirpmás ja lea sihke girječálli, dramatihkar ja govvadáiddár. 1970-jagiid rájes son lea čállán románaid ja diktagirjjiid, earret eará vuosttaš mánáidgirjji sámegillii, Ámmul ja alit oarbmælli. Su diktagirji Beaivváš mánát / leve blandt reptiler (Mondo forlag, 2022) vuittii Grafill balkašumi Jagáš čáppamus girjji (Årets vakreste bok) 2022 ja namuhuvvoi Davviriikkaid ráđi girjjálašvuođa bálkašupmái. Son lea guhká málen ivdnás govaid, ja vuosttaš háve go doalai sierračájáhusa lei Romssa Dáiddasiiddas 2022:s. Dán dálvve sus lea leamašan stuorra sierračájáhus Sámi Dáiddaguovddážis Kárášjogas.
Atelier Kunstnerforbundet
Doalut leat gaskkustandoaibmabidju maid Atelier Kunstnerforbundet lágida. Atelier Kunstnerforbundet fállá dáiddáriidda buvttadanlanjaid ja dárkilit heivehuvvon ovddidanprográmma Kunstnerforbundet iežas visttis Oslo gávpotguovddážis, ja ruhtadeaddjit leat Sparebankstiftelsen DNB, Talent Norge ja Fritt Ord.
Beasatlašvuohta
Čájáhus ja doalut leat gallerija nuppi ceahkkis, dohko beassá boardagiid mielde. Kunstnerforbundet ii leat heivehuvvon universála hábmemiin, muhto váldde oktavuođa jus leat gažaldagat dahje darbbašat veahkki.