Marita Isobel Solberg
Agálaš čuolbma / Valknute / Valknut
Lásesálas
12.01.23 – 19.02.23
Dolin rájes leat olbmot deaivvadan dola birra guldalit muitalusaid ja fámolaš, imašlaš dahkamušaid bokte lei doaivva rievdadit dálááiggi ja boahteáiggi. Dáid meanuid sáhtášii gohčodit daid vuosttaš performánssáid.
Marita Isobel Solberga čájáhus Agálaš čuolbma/Valknute/Valknut* Lásesálas dutká siskkáldas ja olgguldas dola ja mo energiijalonohallan geavvá go mii sihke šaddat ja leat oassin ollislašvuođas ja nubbi nuppiidguin. Solberg lea ráhkadan installašuvnna gos juohke dáiddas ilbmá dolla iešguđet láhkai ja ovttas dat hábmet dáiddalaš dola. Installašuvnnas leat báccit keramihkas ja muoras ja stuorra njuohtan mat dovddahit billisteami, moivvi ja jápmima, muhto maiddái erenomážit doaivva ođđa álgguide.
Dán čájáhusas Solberg čujuha meanuide ja symbolaide sámi, kveana ja eará davvi árbevieruin ja historjjás, noaiddedoaimmaide ja animismii, ja dasto vel agálaš čuolbmái* mii lea dološ, magálaš govadus. Son bargá performánssaiguin ja viggá guoskat gitta siskámužžái ja dagahit váikkuheaddji sparaidemiid. Dáinná duogážiin lea dáiddár noidon energiija dáidagiid sisa hábmendihtii ráhkisvuođa, fámu ja suoji. Dát dasto guoská fáttáide nu mo univearssa ipmašiid, duodjefámu ja dálááigge hástalusaid.
Čájáhusráhpama oktavuođas ođđajagimánu 12. beaivve, Marita Isobel Solberg čájeha ođđa performánssa ja bovde ođđajageseremonijái ja buhtastanrituálas “dolagattis”.
Performánsa lea inspirerejuvvon ođđabeaigállát nammasaš dološ árbevierus Olmmáivákkis. Solberga ruovttobáikkis lávejit ođđajageruohta coggat máskka maid lea duddjon čáđagaskka vássán jagi ja vázzit fárrolága ráiddus vákki čađa. Loahpas de bálkestit máskkaid dollii ja buot vássán baháid ja vášuid boaldit eret.
* Agálaš čuolbma, dahje valknute dárogillii, lea govadat mas okta sárggis mohkkásta ja šaddá symmetrálaš čuolbman. Dát hábmi gávdno kultuvrrain miehtá máilmmi ja lea dávvirikkalaš kultuvrrain doložis govastan agálaš ráhkisvuođa ja suoji vašuid vuostá.
Marita Isobel Solberg (r. 1977, Romssas) lea govvadáiddár, musihkkár ja šuokŋadahkki ja bargá performánssiin, keramihkkain, jienain ja installašuvnnain. Son lea vázzán Oslo Dáiddaallaskuvllas (KHIO) ja lea musihkkajoavkkus MARAS:s láhttu. Solberg lea Olmmáivákkis Davvi-Romssas bajásšaddan ja viežžá inspirášuvnna iežas mearrasámi, kveana ja suomi máttuin. Son lea čájehan Riddu Riđđu Festiválas, Nordland Musikkfestukes, Barents Spektakelis, Davvi-Norgga Dáiddaguovddážis, Sámi Dáiddaguovddážis ja Romssa Dáiddasearvvis, ja miehtá máilmmi earret eará Art Basel, Miamis, Pittsburgh Performance Art Festivalas, MoCA, Taiwanas, Nordic Art Week, Estlánddas, Ca’Pesaro, Venezias, ja Anchorage Museum, Alaskas.