Aslaug Magdalena Juliussen
ieš guhtenai sierranassii
hver og en av dem for seg
each and every one of them on their own
Beaivečuovgasálas
13.04.23—28.05.23
Tekstiilat, fiiberat ja elliid náhkit lea ávdnasat mat boktet rumašlaš dovddidusaid mat gusket suddjemii, gokčamii ja oadjebasvuhtii. Dán čájáhusas Aslaug Magdalena Juliussen ovdanbuktá guokte ođđa dáiddabarggu ráiddus Várddus – Vy – View (2017–2023) mas tekstiila ja muorra leat guovddážis, ovttas ávdnasiiguin elliin. Guovtti installašuvnnain dáiddár earáhuhttá ja dahká imašlažžan tekstiillaid nugo šlipsaid ja bivttasláđiid.
Várdu lea sadji mas lea guhkes oainnus dahje lea oidnosis guhkin eret. Ráiddu dárogiel namma maiddái bukta millii doaivva. Ávnnaslašvuođa bokte Juliussen hábme ođđa geahččanguovlluid. Áddjás bargovuogit lea dehálaš oassi su dáiddalaš barggus ja son gudnejahttá luonddu, ávdnasiid ja árbevieruid njozes ja dárkilis giehtaduojiin. Dáiddár geardduha, imaštallá, botke ja sirre ávdnasiid, ja dán láhkai háliida geahččat ávdnasiid ođđa oktavuođain.
Golbmačiegat bivttasláđiid lea sákkastan ja bidjan oktii soahkesákkiiguin stuorra tekstiilahámiide mat ovttas leat Várddus – Vy – View III nammasaš installašuvdna. Árpput heaŋgájit oidnosis nuppi bealde. Buot gávcci tekstiillat heaŋgájit sierranassii robis Beaivečuogasálas.
Várddus – Vy – View IV lea installašuvdna mas leat báccit mat orrot leat hybriidat lahttu ja ruovjji gasko. Ovtta juolgegeažis leat batnojuvvon šlipsat, ja nuppi geažis ges ceaggá námmečoarvi.
Aslaug M. Juliussen almmuha čájáhuskátaloga mas lea ovdasátni Charis Gullickson bokte, kuráhtor Juliussena čájáhusas Intersections Davvi-Norgga Dáiddamuseas 2018:s.
Aslaug Magdalena Juliussen (r. 1953, Lodegis, Nordlánddas) ássá ja bargá Romssas. Son lea vázzán Stáhta Duodje- ja Dáiddaindustriijaskuvllas Oslos ja biigui tekstiiladáiddára Synnøve Anker Aurdala ovddas 1980-82:s. Juliussenis leat leamaš olu sierračájáhusat, earret eará Anchorage Museas Alaskas, Blaafarveværketas, Davvi-Norgga Dáiddamuseas, Davvi-Norgga Dáiddaguovddážis ja Nordenfjeldske Kunstindustrimuseas, ja lea oasálastán máŋga joavkočájáhusain sihke Norggas ja olgoriikkas. Son lea hábmen moanat almmolaš čikŋabargguid ja máŋga teáhterbuvttademiide dahkan lávdehábmenbargguid. Juliussena dáiddabargguid leat háhkan earret eará Stavanger Dáiddamusea, Nášunalmusea, Davvi-Norgga Dáiddamusea, Sámedikki dáiddačoakkaldat, KORO, Norgga Kulturráđđi ja Norgga Dáiddaduoji Sisaoastinfoanda KODE várás. Son lea jagiid badjel ožžon olu stipeanddaid ja oččui Stáhta Dáhkidandietnasa dáiddáriid várás 2010:s ja Norgalaš Giehtadáiddáriid gudnebálkkašumi 2011:s. Dán jagi lea Sámi Dáiddačehpiid Searvi juohkán sutnje bargostipeandda.
Čájáhusa leat doarjalan Billedkunstnernes Vederlagsfond, Norgga Kulturráđđi, Fritt Ord, Sámediggi, Romssa ja Finnmárkku Fylkkasuohkan, Romssa gielda ja Kunstsentrene i Norge.